Duerch eng staark Equippeleeschtung konnten sech eis Jongen no bal 4 Stonnen an engem héichklassegen an extrem spannende Match mat 6-4 géint Lénger duerchsetzen. D’Iwwerraschung vum Dag huet scho virum Match stattfonnt, Lénger huet missen verletzungsbedéngt op hir Nummer 1 de Christian Kill verzichten, fir hien ass de jonken Aaron Sahr nogeréckelt. Dëst war natierlech zu eisem Virdeel, trotzdeem ware mir eis bewosst dass et nach ëmmer eng immens schwéier Aufgab géif ginn fir am Lénger ‚Hexekessel‘ ze gewannen.

Béid Equippen hunn dovun ofgesinn fir un hirer Opstellung ze dréien, sou datt mir mam Michael Schwarz an David Henkens fir, a mam Eric Thillen an Tom Scholtes hannen gespillt hunn. Lénger huet den Arlindo De Sousa an den Frane Runjic fir opgesat, an de Jim Cloos an den Aaron Sahr hannen.

De formstaarke Michael konnt sech an dräi ganz enke Sätz géint de Runjic duerchsetzen, den David huet sech an engem flotte Match géint e staarken De Sousa no fënnef Sätz misse geschloen gin. Och hannen goufen déi éischt Matcher gedeelt, den Eric gewënnt 3-1 géint de Sahr, den Tom verléiert 1-3 géint de Cloos. An de verbleiwende Matcher huet also missen e Break hir, well just eng Victoire hätt d’Halleffinall fir eis bedeit.

Zu engem Break ass et dunn och komm, allerdéngs net fir eis Faarwen. Den De Sousa huet mat enger 3-1 Victoire ënnerstrach dass hien deen Dag de beschte Spiller an der Hal war, den David huet och säin zweete Match ganz knapp a fënnef Sätz géint de Runjic verluer. No sechs Eenzel stoung et also 2-4, a mir stoungen mam Réck zur Mauer, eng weider Victoire fir Lénger hätt hinnen d’Platz an der Halleffinall gesechert, mir hunn also déi véier lescht Matcher misse gewannen!

Allerdéngs war de Momentum och weiderhin op der Säit vun Lénger, souwuel den Eric wéi och den Tom hunn den éischte Saz géint de Cloos, respektiv de Sahr verluer. Den Eric konnt sech steigeren an huet mat 14-12 e vlaischt decisiven 0-2 Réckstand verhënnert, éier hien duerno mat 2-1 a Féierung gaangen ass. Um aneren Dësch huet et däitlech méi schlecht ausgesinn, den Tom ass einfach net an de Match komm a stoung mat 0-2 an 8-10 schonn um Rand vun der Néierlag. Hien huet an dësem kruziale Moment awer net opginn a konnt mat véier Punkten no Gang nach de Saz fir sech decidéieren. Hien huet dunn besser an de Match fonnt a konnt och de véierte Saz gewannen, parallel huet den Eric de véierte Saz ofginn, sou dass et a béide Matcher an den decisive Saz gaangen ass. Hei hunn eis Jongen d’Nerve behalen a konnten sech knapp duerchsetzen.

Dësen Exploit huet eis zwar rëm an de Match bruecht, mee mir hunn nach ëmmer déi zwee Dubbelen gewanne missen fir eis fir d’Haleffinall ze qualifizéieren. Hei war, wéi d’ganz Saison schonn, verlooss op eise Spëtzendubbel Schwarz/Henkens, si konnten sech 3-0 géint De Sousa/Cloos duerchsetzen. Et huet also alles vum Tom a vum Eric ofgehaangen, no engem gudde Start an engem 2-0 Avantage hunn Runjic/Sahr sech zréckgekämpft an de Match ass an de fënnefte Saz gaangen. Hei konnt sech keen ofsetzen, sou dass d’Spannung bei 9-9 um absolutten Héichpunkt war. Zwee Ballwiessel drop war der Berbuerger Freed keng Grenze méi gesat, den Tom an den Eric hunn den Deckel drop gemaach an hunn eis d’Victoire géint Lénger gesechert, un déi eng Stonn virdrun warscheinlech kee méi gegleeft hat.

Man of the Match op der Berbuerger Säit war definitiv den Eric, deen mat 2 Eenzel Victoiren a mam gewonnen Dubbel un 3 vun eise 6 Punkten bedeelegt war. Hien war, no engem aussergewéinleche Start an d’Saison, an deenen leschte Méint vill mat Verletzunge geplot, mee hien huet sech zréck gekämpft an huet e groussen Undeel un dësem Exploit. Chapeau awer un all eis Jongen, de Match war tëschenzäitlech sou gutt wéi verluer, mee si hunn ni opginn a konnten de Match nach dréien!

En decke MERCI geet och un eis Supporter! Si waren ganz zuelräich vertrueden an hunn d’Jongen ni opginn. Grousse Respekt geet och un d’Lénger Equipe, déi sech trotz dem Feelen vun hirer Nummer 1 sou deier verkaf hunn, an och un d’Lénger Supporter, déi zesummen mat eis fir eng super Ambiance gesuergt hunn a Kaméidi gemaach hunn wéi et nach net vill Matcher am Lëtzebuerger Dëschtennis erlieft hunn. Et war e ganz spektakuläre Match, vill schéi Ballwiessel, 5 vun den 10 Matcher sinn an de fënnefte Saz gaangen, 3 dovunner goufen richt mat 11-9 decidéiert. Et war eng fantastesch Reklamm fir den Dëschtennis zu Lëtzebuerg.

Domat steet Berbuerg fir déi zweete Kéier an der Halleffinall vum lëtzebuerger Dëschtennischampionnat, déi den 16. an 23. Abrëll gespillt gin. De Géigner ass nach net bekannt, Lénger, Éiter-Waldbriedimus, Recken an den Houwald spillen an enger Ausscheedungsronn nach eng Kéier géinteneen, déi zwou beschten Equippen wäerten sech dann niewent Hueschtert-Folscht an eis nach fir d’Halleffinall qualifizéieren.

GO DTB!